മുംബൈ: ഇന്ത്യ-ന്യൂസിലന്‍ഡ് രണ്ടാം ക്രിക്കറ്റ് ടെസ്റ്റിന് ഇന്ന് തുടക്കമാകും. രാവിലെ ഒന്‍പതര മുതല്‍ മുംബൈ വാങ്കഡെ സ്‌റ്റേഡിയത്തിലാണ് മത്സരം. ഇന്ത്യന്‍ നിരയിലേക്ക് നായകന്‍ വിരാട് കോഹ്‌ലി മടങ്ങിയെത്തും. ലോക ടെസ്റ്റ് ചാമ്പ്യന്മാര്‍ക്കെതിരെ ജയിക്കാവുന്ന മത്സരത്തിലാണ് ഇന്ത്യ സമനില വഴങ്ങിയത്. കോഹ്‌ലി മടങ്ങിയെത്തുന്നതോടെ ഒന്നുകൂടി ശക്മാകുന്ന ബാറ്റിങ് നിരയില്‍ നിന്നും ആര് പുറത്താകും എന്നതാണ് നിലവിലെ ചോദ്യം. 

മധ്യനിരയില്‍ അജിങ്ക്യ രഹാനെയും ചെതേശ്വര്‍ പുജാരയും പഴയ ഫോമിലല്ല. ഇനിയും ഇവര്‍ക്ക് അവസരം നല്‍കുന്നതില്‍ മുന്‍ താരങ്ങള്‍ ഉള്‍പ്പടെ വിമര്‍ശനം ഉന്നയിക്കുന്നുണ്ട്. എന്നാല്‍ ആരെ പുറത്തിരിത്തും എന്നതില്‍ ഇനിയും വ്യക്തതയില്ല. സീനിയര്‍ താരങ്ങളെ നിലനിര്‍ത്തിയാല്‍ ഓപ്പണര്‍ മയങ്ക് അഗര്‍വാളിന് സ്ഥാനം നഷ്ടമാകും. വിക്കറ്റ് കീപ്പര്‍ വൃദ്ധിമാന്‍ സാഹ പരിക്കില്‍ നിന്നും പൂര്‍ണമായി മുക്തനായിട്ടുണ്ട്.