ബ്രസീലിയൻ ഫുട്‍ബോളിന്റെ ഇതിഹാസമായ പെലെ, ഓരോ ഫുട്‍ബോൾ ആരാധകന്റെയും മനസ്സിൽ കൊള്ളിയാൻ പോലെ ഓർമ്മിക്കാവുന്ന വ്യക്തി. എന്നാൽ ഇന്ന് അദ്ദേഹത്തെ വിഷാദരോഗം കീഴ്പ്പെടുത്തിയിരിക്കുകയാണ്. പെലെയുടെ മകൻ എഡീഞ്ഞോ ഒരു ബ്രസീലിയൻ മാധ്യമത്തിന് നൽകിയ അഭിമുഖത്തിലാണ് ഇക്കാര്യം വ്യക്തമാക്കിയത്. 

'ഫുട്‍ബോളിലെ രാജാവായിരുന്ന പെലെ എന്ന വ്യക്തിക്ക് ഇന്ന് പരസഹായമില്ലാതെ നടക്കാനാകില്ല, ആ സത്യം അംഗീകരിക്കാൻ കഴിയാതെ സ്വയം ഒരു നാണക്കേടിൽ നിൽക്കുകയാണദ്ദേഹം. അതാണ് അദ്ദേഹത്തെ വിഷാദരോഗിയാക്കിയത്' -എഡീഞ്ഞോ പറഞ്ഞു. 

2014 മുതൽ പെലെയുടെ ആരോഗ്യനില വഷളായിരുന്നു. ഈ അടുത്തകാലത്ത് ഇടുപ്പ് മാറ്റിവയ്ക്കൽ ശസ്ത്രക്രിയ നടത്തിയതോടെ വീൽചെയർ കൂടാതെ സഞ്ചരിക്കാനാവില്ല. ഇപ്പോൾ ആരോഗ്യം ഭേദപ്പെട്ടതിനാൽ വാക്കറുപയോഗിച്ച് നടക്കാനാകും. 

1363 കളികളിൽ നിന്നായി 1284 ഗോളുകളാണ് ഈ ഇതിഹാസം നേടിയെടുത്തിട്ടുള്ളത്. ഈ വരുന്ന മെയ് മാസത്തിൽ പെലെയുടെ മൂന്നാം ലോകകപ്പിന്റെ അൻപതാം വാർഷികം ആഘോഷിക്കാനൊരുങ്ങുകയാണ് ആരാധകർ. മൂന്ന് ലോകകപ്പുകൾ സ്വന്തമാക്കിയ ഒരേയൊരു ഫുട്‍ബോൾ താരമാണ് പെലെ.