ന്യൂഡൽഹി: ഇന്ന് തുടങ്ങുന്ന ഇന്ത്യ-ദക്ഷിണാഫ്രിക്ക ഏകദിന പരമ്പരയിലെ ആദ്യ മത്സരം അടച്ചിട്ട സ്റ്റേഡിയത്തിൽ നടത്തണമെന്ന് കേന്ദ്ര സർക്കാർ. കൊറോണ വൈറസ് രാജ്യത്താകമാനം പടർന്ന് പിടിക്കുന്നതിന്റെ പശ്ചാത്തലത്തിലാണ് സർക്കാരിന്റെ നിർദ്ദേശം. 

അടച്ചിട്ട സ്റ്റേഡിയത്തിൽ മത്സരം നടത്തണമെന്നും ആൾക്കൂട്ടം ഒഴിവാക്കണമെന്നും ചീഫ് സെക്രട്ടറിക്ക് നിർദ്ദേശം നൽകി. ഹിമാചൽ ക്രിക്കറ്റ് അസോസിയേഷനെ നിർദ്ദേശം അറിയിച്ചിട്ടുണ്ട്. എന്നാൽ തങ്ങൾക്ക് ഔദ്യോഗിക അറിയിപ്പ് കിട്ടിയിട്ടില്ലെന്ന് ബി.സി.സി.ഐ പ്രതികരിച്ചു. 

മൂന്ന് മത്സരങ്ങളടങ്ങിയ ഇന്ത്യ-ദക്ഷിണാഫ്രിക്ക ഏകദിന പരമ്പരയിലെ ആദ്യ മത്സരം ഹിമാചൽ പ്രദേശ് ക്രിക്കറ്റ് അസോസിയേഷൻ സ്റ്റേഡിയത്തിൽ വച്ചാണ് നടക്കുക. ഉച്ചക്ക് ഒന്നരക്കാണ് മത്സരം. 15 ന് ലക്‌നൗവിൽ വച്ച് രണ്ടാം മത്സരവും 18 ന് അവസാന മത്സരവും നടത്താനാണ് നിശ്ചയിച്ചിട്ടുള്ളത്.