മനുഷ്യ ശരീരം ആരോഗ്യത്തോടെ സൂക്ഷിക്കുന്നതിന് കറിവേപ്പില വഹിക്കുന്ന പങ്ക് നിസാരമല്ല. സാധാരണ നിലയിൽ ഒരു ശരീരത്തിലുണ്ടായേക്കാവുന്ന പല അസുഖങ്ങളെയും ചെറുത്ത് നിർത്താൻ കഴിവുള്ള വസ്തുവാണ് കറിവേപ്പില. കറിവേപ്പിലയുടെ ഗുണങ്ങൾ എന്തൊക്കെയാണെന്ന് നോക്കാം. 

പ്രമേഹ രോഗമുള്ളവർക്ക് കറിവേപ്പില ചേർത്ത ഭക്ഷണം നൽകുന്നത് ഗുണകരമാണ്. ഒരു പരിധിവരെ ഇത് പ്രമേഹം നിയന്ത്രിക്കാന്‍ കഴിയുമെന്നാണ് പഠനങ്ങള്‍ തെളിയിക്കുന്നത്. ഇതിലുള്ള ഹൈപ്പര്‍ ഗ്ലൈസമിക് പദാര്‍ത്ഥങ്ങളാണ് പ്രമേഹത്തെ തടയുന്നത്. കാഴ്ച്ചശക്തിക്ക് അത്യുത്തമമാണ് കറിവേപ്പില. വിറ്റാമിൻ എ യുടെ കലവറ കൂടിയാണിത്. 

ദഹന സംബന്ധമായ പ്രശ്‌നങ്ങള്‍ക്ക് പരിഹാരമാണ് കറിവേപ്പില. കറിവേപ്പില ജ്യൂസില്‍ നാരങ്ങാ നീരൊഴിച്ച് കഴിച്ചാല്‍ ദഹന സംബന്ധമായ പ്രശ്‌നങ്ങള്‍ പരിഹരിക്കപ്പെടും. കറിവേപ്പില അരച്ച് പേസ്റ്റ് രൂപത്തിലാക്കി മോരില്‍ കലക്കി കുടിക്കുന്നത് ഡയറിയ പോലുള്ള പ്രശ്‌നങ്ങള്‍ക്ക് പരിഹാരമാകും. ഇതിലുള്ള കാര്‍ബസോള്‍ ആല്‍ക്കലോയ്ഡ്‌സ് എന്നിവയുടെ സാന്നിധ്യമാണ് ഡയറിയയെ ചെറുക്കുന്നത്. 

മുടിയുടെ ആരോഗ്യത്തിനും ഇത് ഏറെ നല്ലതാണ്. മുടി വളര്‍ച്ചയ്ക്കും മുടിനര മാറുന്നതിനുമെല്ലാം കറിവേപ്പില ഏറെ ഉത്തമമാണ്. കറിവേപ്പില അരച്ചു പുരട്ടുന്നത് ചര്‍മ്മ രോഗങ്ങളെ ശമിപ്പിക്കും. കറിവേപ്പിലയും മഞ്ഞളും അരച്ചു പുരട്ടിയാല്‍ പുഴുക്കടി തടയും. കാല്‍പാദം വിണ്ടു കീറുന്നതിനും കുഴി നഖം ഇല്ലാതാക്കാനും കറിവേപ്പില സഹായിക്കുന്നു. 

വൈറ്റമിനുകളും മിനറലുകളുമെല്ലാം ധാരാളമായി അടങ്ങിയിരിക്കുന്നതിനാൽ ശരീരത്തിന് രോഗപ്രതിരോധശേഷി വർദ്ധിപ്പിക്കുന്നതിന് ഏറെ ഗുണകരമാണ് കറിവേപ്പില.