റാവൽ പിണ്ടി : പാകിസ്ഥാൻ ക്രിക്കറ്റ് ടീമിലെ ഏഴു താരങ്ങൾക്കു കൂടി കോവിഡ് സ്ഥിരീകരിച്ചതായി പാക് ക്രിക്കറ്റ് ബോർഡ് അറിയിച്ചു. ഇതോടെ കോവിഡ് ബാധിച്ച പാക് ക്രിക്കറ്റ് താരങ്ങളുടെ എണ്ണം പത്തായി. ഇംഗ്ലണ്ട് പര്യടനത്തിൽ പങ്കെടുക്കേണ്ടിയിരുന്ന മുഹമ്മദ് ഹഫീസ്, വഹാബ് റിയാസ് എന്നിവരടക്കം ഏഴ് പാക് ക്രിക്കറ്റ് താരങ്ങൾക്ക് കൂടിയാണ് കോവിഡ് സ്ഥിരീകരിച്ചത്. കാഷിഫ് ഭാട്ടി, മുഹമ്മദ് ഹസ്നൈൻ, ഫഖർ സമൻ, മുഹമ്മദ് റിസ് വാൻ, ഇമ്രാൻ ഖാൻ, ഹഫീസ്, റിയാസ് എന്നിവർക്കാണ് രോഗം സ്ഥിരീകരിച്ചത്. ടീമിന്റെ സപ്പോർട്ടിങ് സ്റ്റാഫായ മാലങ് അലിക്കും കോവിഡ് സ്ഥിരീകരിച്ചതായി പി.സി.ബി അറിയിച്ചു. ഇംഗ്ലണ്ട് പര്യടനത്തിന് മുൻപായി റാവല്പിണ്ടി യിൽ വെച്ച് നടന്ന പരിശോധനയിലാണ് താരങ്ങൾക്ക് രോഗം സ്ഥിരീകരിച്ചത്. 'ചെറുപ്പക്കാരും കായിക താരങ്ങളുമായ പത്ത് പേർക്കാണ് രോഗം സ്ഥിരീകരിച്ചത്. ക്രിക്കറ്റ് താരങ്ങൾക്ക് വരുമെങ്കിൽ ആർക്കും രോഗം പിടിപെടാം'. പി.സി.ബി ക്രിക്കറ്റ് ബോർഡ് സി.ഇ.ഒ വസീം ഖാൻ മാധ്യമങ്ങളോട് പറഞ്ഞു.