ന്യൂഡൽഹി: കാർഷിക നിയമങ്ങൾ പിൻവലിച്ചത് സർക്കാരിന്റെ ബലഹീനതയല്ലെന്ന് കേന്ദ്ര മന്ത്രി നിർമല സീതാരാമൻ. കാർഷിക നിയമങ്ങൾ പിൻവലിച്ച തീരുമാനം ഭാവിയിൽ കീഴ്വഴക്കമായി മാറില്ലെന്നും അവർ പറഞ്ഞു. സ്വകാര്യ ചാനൽ സംവാദത്തിൽ സംസാരിക്കുകയായിരുന്നു മന്ത്രി. സർക്കാരിന്റെ ആസ്തി വിറ്റഴിക്കൽ, സ്വകാര്യ വൽക്കരണം തുടങ്ങിയ നയപരമായ പരിഷ്കാരങ്ങളെ കാർഷിക നിയമങ്ങൾ പിൻവലിക്കൽ ബാധിക്കില്ല. കാർഷിക നിയമങ്ങൾ അവതരിപ്പിക്കുന്നതിനു മുമ്പ് വിശദമായ ചർച്ചകൾ നടത്തുകയും ഇതുമായി ബന്ധപ്പെട്ടവരുമായി കൂടിയാലോചന നടത്തുകയും ചെയ്തു. മൂന്നു നിയമങ്ങളും പെട്ടെന്നുകൊണ്ടുവന്നതല്ല. സർക്കാർ ഗൃഹപാഠം ചെയ്തിരുന്നു. എല്ലാ പാർട്ടികളും വർഷങ്ങളായി അവക്ക് അനുകൂലമായിരുന്നു- നിർമല സീതാരാമൻ പറഞ്ഞു.